Med ny fasade

FrP har pussa opp klimafasaden sin. Der Carl I. Hagen var gamaldags faktafornektar og ikkje ‘trudde’ på global oppvarming, har partiet no køyrt fram Tor Mikkel Wara som talsperson. Han avviser ikkje at menneska påverkar klimaet. I staden hevdar han at frykta for klimakatastrofe er overdrive, og ikkje noko vi treng uroe oss særleg for.

Ny høgrepopulistisk klimaprofil

Wara med kronikk NRK 23. juni: Mange av oss vart først oppmerksomme på Tor Mikkel Wara i si nye rolla då han i ein kronikk hevda at det er journalistene som bles opp klimaproblema: «Konsekvensene av slik dommedagsjournalistikk kan være alvorlige, både for publikum og pressen selv.»

Wara i Ole Asbjørn Ness sin podcast: Den som vil skaffe seg nærare kjennskap til FrPs nye profil kan sjå den timelange samtala med Wara der han får lov å breie seg (til nesegrus beundring frå Ness), medan han hånar og latterleggjer det meste av norsk klimaforståing og klimapolitikk: «Klimapolitikken er en bortskjemt unge.»

Wara i Dag og Tid 10. juli: I eit lengre intervju med vekeavisa Dag og Tid utdjupar Tor Mikkel Wara synspunkta sine frå m.a. NRK-kronikken:

• Ja, klimaendringar skjer, og dei er i stor grad menneskeskapte.
• Nei, klimaendringane er ikke faretruande, og dei fleste vil i røynda få det betre også utan klimatiltak, både i Noreg og elles i verda.
• Ja, vi treng klimatiltak, men dei må ikkje hemme veksten i økonomien.
• Men tilgong på billig energi er avgjerande også for vår evne til å takle klimaproblem.

Langt frå føre var

Det er kome fleire reaksjonar på utspela til FrPs nye klimapolitiske talsperson. Mellom desse er:

• Carlo Aall, klimaforskar Vestlandsforsking: «Kunsten å latterliggjøre klimaarbeid vha. løsrevne tall.»
• Anders Bjartnes, Norsk Klimastiftelse: «Tor Mikkel Wara kirsebærplukker tall som får klimaendringene til å se ut som en bagatell.»

I Dag og Tid 17. juli har Halfdan Wiik frå BKA denne korte kommentaren til intervjuet med Tor Mikkel Wara:

Det eg les ut av intervjuet med Tor Mikkel Wara i siste nummer av Dag og Tid, er at han er smartare enn Carl I. Hagen. Elles er FrP sin klimapolitikk i full strid med føre var-prinsippet, slik han alltid har vore.

For om ein blankt avviser at vi har menneskeskapte klimaendringar – som Hagen – eller bagatelliserer konsekvensane, som Wara gjer, kjem ein i praksis fram til det same: Dette er ikkje noko vi treng å bekymre oss for. Det er journalistane og miljørørsla som har piska opp frykta for klimakrisa, utan at forskinga gir grunnlag for det.

Wara viser til rapporten ‘Norge i hardt vær’. Der finn han at klimaendringane ikkje utgjer nokon alvorleg trussel mot norsk økonomi. Merkeleg nok har han ikkje funne det som står i kapittel 5: «Svært alvorlige konsekvenser som blant annet endring av havstrømmer, havforsuring, nedsmelting av innlandsisen på Grønland og Antarktis, nedsmelting av tundraen eller mulighet for andre typer vippepunkter i form av økologisk kollaps er i liten grad dekket i utvalgets rapport.»

Her er vi ved kjernen i saka. Rett nok seier Wara at vi treng meir forsking på vippepunkt. Gjerne det. Men det dei som skal arve denne jorda, først og fremst treng, er politikarar som forstår og respekterer ei tydeleg verdibasert tenking: at risiko for alvorleg eller irreversibel skade er tilstrekkeleg grunn til å setje inn førebyggjande tiltak, sjølv om den vitskaplege kunnskapen er usikker eller ufullstendig. Her har FrP framleis ein lang veg å gå.

Halfdan Wiik
medlem av Besteforeldrenes klimaaksjon